Параскева Римская

Тщание имущи сообразно имени твоему, тезоименитая, равноимянную тебе веру в сожительство избрала еси, Параскево победоносная, темже изливаеши исцеления и молишися о душах наших.

Храм твой, всечестная, яко врачебницу душевную обретше, в нем вси вернии велегласно почитаем тя, преподобномученице Параскево славная.

Страстотерпице, вернии, песнь Параскеве, приидите, согласно воспоим, облиставает бо чудесы в мире, отгоняющи прелести тьму, и дающи верным благодать независтную, зовущим: радуйся, мученице многострадальная.

О, святая и многострадальная преподобномученице Параскево! К тебе, аки теплей за ны к Богу молитвеннице, припадаем и прилежно молимся: умоли Господа и Владыку нашего пробавити милость Свою к нам, недостойным рабом Его, даровати же нам душевное и телесное здравие, земли плодоносие, воздуха благорастворение, во благочестии христианстем преуспеяние, к житию временному нужная и довольная, и вся ко спасению потребная; да мирно и благочестно поживше, сподобимся благую кончину христианскую улучити и Царствие Небесное наследити. Ей, предстательнице наша благая! Не посрами упования нашего, еже по Бозе и Пресвятей Богородице крепкое на Тя возлагаем, но буди нам ходатаица во спасение, да сподобимся вкупе с тобою и всеми святыми в радости блаженства вечнаго славити во твоем заступлении великую милость Бога нашего, Отца, и Сына, и Святаго Духа, ныне и присно, и во веки веков. Аминь.

Песнь 1

Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыни победил есть.

Припев (при келейном чтении): Святая преподобномученице Параскево, моли Бога о нас.

Поющим светоносную память твою, мученице всехвальная, моли благодать даровати нам и грехов оставление, Параскево славная, твоими ко Господу прошении.

Мня разрушити силу терпения твоего, мученице, властитель грозно повелеваше кланятися истуканным, но мудрыми твоими глаголы вся дерзость его разрушися.

Мучеников ты красота явилася еси, врага ухищрения низвергши оружием креста, и, властителей лютость мученически одолевши, богочестивую веру проповедала еси.

Богородичен: Слово от Твоих пречистых кровей, Владычице, раждается, одушевленную плоть прием, и нас, падших угрызением обольстителя, Божественною силою возставило есть.

Песнь 3

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

Утвердил есть немощное Божественный Дух и вельми светлое показа богоподобное чистыя твоея души сияние.

Укреплена силою Христа, воловиих жил нещадная бичевания, мученице Христова, претерпела еси, яко некий адамант твердейший.

Любовию, яже к Богу, на тризнищи твердо претерпела еси биения тела скорпионами и неисчетная иная бичевания.

Богородичен: Ты едина сущим на земли премирных благ Подательница была еси, Мати Божия, темже Ти, радуйся, зовем.

Седален, глас 5

От пелен матерних Христу себе посвятивши, яко мученица, Тому выну благоугождала еси, Спасителю всех, и, дерзость мучителей твердо поправши, страдания воистину мужески претерпела еси. Темже Христос, венчав тя, в Небесный чертог славы введе. Параскево досточудная, проси нам у Христа Бога оставление грехов.

Песнь 4

Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающи: слава силе Твоей, Господи.

Исцеления получивши, и дарования, и видения, славная, Божественныя источаеши токи благодати всегда верою тя почитающим и ко храму твоему прибегающим.

Порока воистину и скверны никакоже имущи, освящение же телесе стяжавши, Ангелов узрела еси, с нимиже возопила еси: слава силе Твоей, Господи.

Коль ужасно знамение страшнаго дне, внегда спасительная страсть вообразися в женстем телеси твоем, крест, и тростие, и венец, и губу узрела еси.

Богородичен: Неискусобрачно зачала еси, о Дево, и по рождестве явилася еси девствующая паки. Темже немолчными гласы, радуйся, верою несумненною вопием Ти, Владычице.

Песнь 5

Ирмос: Ты, Господи, мой Свет, в мир пришел еси, Свет Святым, обращаяй из мрачна неведения верою воспевающия Тя.

Подвизалася еси, честная, и мучителя витийствы премудрыми смысленно попрала еси пред судищем, Христа проповедающи.

Ум имущи твердый, безтрепетною мыслию постыдила еси вся идольская чествования, разумом писаний.

Ложа умнаго и чертога сподобилася еси, ликовствующи с девами богомудрыми, Параскево славная.

Богородичен: Тя, оружие несокрушимое, на враги обращаем, Тя якорь и надежду спасения нашего, Богоневесто, стяжахом.

Песнь 6

Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.

Ангела пришествием, на персех твоих положенную превелию дску, всечестная, и гвозди на руках, славная мученице, Господь манием Божественным скоро отъял есть.

Новую тя первомученицу Феклу славим, яко проповедавшую всем, и многих просветившую Божественным словом, и неверных к Божественней вере приведшую.

Отверзошася твоя, Божественных догмат ковчеже, медоточная уста, ведению всех поучающая с дерзновением, Параскево, мучеников украшение.

Богородичен: О чудо, всех чудес страннейшее! Яко Дева во утробе, Всеобъемлющаго неискусомужно заченши, не утеснися.

Кондак, глас 4

Храм твой, всечестная, яко врачебницу душевную обретше, в нем вси вернии велегласно почитаем тя, преподобномученице Параскево славная.

Икос

Глас Жениха, призываяй тя, яко невесту, украси тя венцем безсмертия, Богомудрая Параскево всехвальная, и к венценосцем и мучеником честным достойно сопричте. С нимиже веселящися, поминай совершающих святый праздник твой и сошедшихся в храм твой, в нем бо ныне предстояще, от души приносим ти песни, преподобномученице Параскево славная.

Песнь 7

Ирмос: В пещи авраамстии отроцы персидстей, любовию благочестия паче, нежели пламенем, опаляеми, взываху: благословен еси в храме славы Твоея, Господи.

Господем сохраняема, пред судищем нечестивых, мученице, мышцы укрепила еси твердо, пламенем опаляема, внегда воспевати тебе, зовущей: благословен еси, Боже мой и Господи.

Огнь горящий никакоже тя, нечестивых же паче опаляше, отроковице, Христос же сохраняше тя неврежденну, якоже древле сохрани, посреде огня шумяща, рукою крепкою небоязненныя отроки.

Земли всея мудро и небесе не сотворшии, демонстии идоли и бози да погибнут,— вопияла еси; Христос же Господь,— проповедала еси,— Творец есть всяческих.

Богородичен: Вышняго освященное Божественное селение, радуйся, Тобою бо дадеся радость, Богородице, зовущим: благословенна Ты в женах еси, Всенепорочная Владычице.

Песнь 8

Ирмос: Руце распростер, Даниил львов зияния в рове затче; огненную же силу угасиша, добродетелию препоясавшеся, благочестия рачители, отроцы, взывающе: благословите, вся дела Господня, Господа.

Не сущия боги, но лживыя демонов привидения показала еси, мученице, и всячески попрала еси я и вконец сокрушила еси, в веселии Христу непрестанно поющи: благословите, вся дела Господня, Господа.

Капищу поколебавшуся на земли пришествием твоим, честная, паде Аполлон и устрелены быша идоли силою честнаго Креста, имже таинственно огражденна, с дерзновением многим вопияла еси: вся дела, благословите Господа.

Красотою и любовию Твоею, Христе, уязвлена, Параскева чистая огня жжение претерпе, вопиющи: в воню Божественнаго мира Твоего, ныне страдальчествующи твердо, теку непрестанно вослед Тебе, славословящи Божественное Твое Имя.

Богородичен: Ты едина во всех родех, Дево Пренепорочная, Мати явилася еси Божия, Ты Божества бяше вселение, Пречистая, не опалена огнем неприступнаго Света. Темже вси Тя славословим, Марие Богоневесто.

Песнь 9

Ирмос: Камень нерукосечный от несекомыя горы, Тебе, Дево, краеугольный отсечеся, Христос, совокупивый разстоящаяся естества. Тем, веселящеся, Тя, Богородице, величаем.

Мимотекущее житие и привременное, мученице Богомудрая, пренебрегла еси, красоту видевши недомыслимую Жениха твоего, гнавши по Нем яве. Темже венец улучила еси нетленный, добрая дево.

Услышавши глас Божественный, с небесе отвещающ, Параскево, на прошения сердца твоего, течение бодро скончала еси, мученице честная, и к Нему востекла еси, во главу усечена честную.

Победу на враги даровати моли Христа, Параскево, всем к Божественному храму твоему приходящим с теплейшею верою, и грехов оставление, и от бед избавление.

Богородичен: Явилася еси Херувимы превосходящая и Небес вышшая, Чистая Дево Марие, Великаго Совета Ангела рождши, собезначальнаго Отцу, Судию всех грядущаго.

Ексапостиларий

Укреплена, добрая дево, Крестом Господа твоего, мучителей дерзость победила еси, страдающи доблественне, мученице, и к венцем победным Христа отыде, Параскево всечудная, о нас молящися, любовию тя почитающих.

Кондак 1

Взбранной невесте Христовой, святей преподобномученице Параскеве, с верой и любовию похвальное пение, яко благой целительнице, приносим; ты же, страстотерпице Христова, милостивно нам приклонися, подвиги и страдания твоя воспевающим, и от всяких бед свободи ны, со умилением зовущия ти:

Радуйся, преподобномученице Христова, Параскево всеславная.

Икос 1

Ангел Господень послан бысть возвестити неплодным родителем твоим, преподобномученице, яко Бог молитву их услыша: родити бо имут дщерь благословенную, Царствия Небеснаго наследницу. Таковому, предивному предвозвещению о рождении твоем дивящеся, яко избранницу Божию ублажаем тя похвалами сими:

Радуйся, ангельским проречением провозвещенная; радуйся, неплодие родителей своих рождением твоим разрешившая.

Радуйся, многими молитвами у Бога испрошенная; радуйся, всех в молитве не унывати научившая.

Радуйся, благаго корене святое прозябение; радуйся, христолюбивых отца и матере дщерь боголюбезная.

Радуйся, от чрева матерня на служение Христу предызбранная; радуйся, Жениху Нетленному девство свое обручившая.

Радуйся, божественнаго к людям милосердия явление; радуйся, молитвы кадило непрестанное.

Радуйся, ленивых обличение; радуйся, сумнящихся благое утверждение.

Радуйся, преподобномученице Христова, Параскево всеславная.

Кондак 2

Видевши мира суету и непостоянство, Параскево Богомудрая, от мира удалитися вожделела еси, да возможеши непрестанно благоугождати Христу Богу и невозбранно иго Его благое понести, в молитвах же присно прилежати, зовущи Ему: Аллилуиа.

Икос 2

Разум небесный стяжавши, преподобномученице Параскево, по кончине родителей твоих вся имения нищим раздала есть, в путь исповедания Христова усердно потекши, того ради восхваляем тя сице:

Радуйся, красотою душевною просиявшая; радуйся, о телесной доброте небрегшая.

Радуйся, благодатию Святаго Духа душу твою исполнившая; радуйся, исповедания имене Его не убоявшаяся.

Радуйся, исповеднице Христова непоколебимая; радуйся, страстотерпице Иисусова многострадальная.

Радуйся, благовестнице Евангелия богомудрая; радуйся, добродетелей многих вместилище.

Радуйся, преподобномученице Христова, Параскево всеславная.

Кондак 3

Силою Божиею свыше укрепляема, святая преподобномученице Параскево, немощь естества женскаго отложила еси и, в броню исповедания Христова облекшися, со идолослужители крепко ратовала еси, иже аще и лютыми мученьми от любве Христа Бога тя отвратити тщахуся, но терпением твоим побежденни явишася, и со Ангелы Богу воспевала еси: Аллилуиа.

Икос 3

Имела еси душу, мужеством о Христе преисполненную, Параскево богомудрая, мучителей нечестивых крепко посрамила еси, темже мучительству их посмевающеся, аки в чуждем телеси бывши, Христа ради вся претерпела еси, нас же научила еси воспевати ти сицевая:

Радуйся, громогласная Божия исповеднице; радуйся, Сладчайшего Иисуса невесто прекрасная.

Радуйся, девство непорочное Ему в дар принесшая; радуйся, кровь твою за Него пролиявшая.

Радуйся, пред судии и мучители имя Его небоязненно исповедавшая; радуйся, свидетелей мучений твоих к вере приведшая.

Радуйся, в молитвах наших теплое прибежище; радуйся, нашего на Господа упования утверждение.

Радуйся, любителем временных наслаждений обличение; радуйся, горних ищущих ободрение.

Радуйся, в борениих сущим помощнице; радуйся, обидимым благое утешение.

Радуйся, преподобномученице Христова, Параскево всеславная.

Кондак 4

Бурею неверия одержимый царь Антонин удивися, егда тя виде в котле кипящем невредиму; егда же руце свои, от котла исполнивши, на лице мучителя повергла еси, той опален вопияше: «Помилуй мя, рабо истиннаго Бога, и даждь ми свет очей моих, да уверую в Бога, Его же ты проповедуеши, и пою Ему купно с тобою: Аллилуиа».

Икос 4

Слышавше многая и лютая страдания твоя, Параскево преславная, и мы, грешнии, терпению твоему умиленно дивимся: како и железо разженное на главе твоей носила еси и биения лютая многажды претерпела еси; темже тя ублажающе зовем:

Радуйся, язвы Господа Иисуса на теле твоем носившая; радуйся, Того Единаго возлюбившая.

Радуйся, об укрепляющем тя Господе вся возмогшая; радуйся, чудеса многая во уверение идолослужителей сотворившая.

Радуйся, терпением мучителей твоих препобедившая; радуйся, невернаго царя покаравшая.

Радуйся, исцеление тому милостиво подавшая; радуйся, среди народа римскаго имя Христово вельми прославившая.

Радуйся, всем языком образ долготерпения явившая; радуйся, всем родом исполнение веры показавшая.

Радуйся, восхваляющим подвиги твоя благодатное просвещение дарующая; радуйся, о гресех их Господа умоляющая.

Радуйся, преподобномученице Христова, Параскево всеславная.

Кондак 5

Боготечней звезде уподобилася еси, святая преподобномученице Параскево, грады и страны многия обходящи и Имя Христово проповедающи, за Него же многажды даже до крове пострадала еси, темже днесь томужде Господу предстоиши, непрестанно воспевающи ангельскую песнь: Аллилуиа.

Икос 5

Видевше людие преславное чудо твое, преподобномученице, како дракона великаго Имени Божия призыванием поразила еси, во Христа абие увероваша, глаголюще ти:

Радуйся, Господа и Христа твоего страданьми и чудесы прославившая; радуйся, спасения многих душ человеческих виновнице.

Радуйся, добропобедная страстотерпице Христова; радуйся, многочудесная свидетельнице Иисусова.

Радуйся, насадительнице веры истинныя; радуйся, милостивая целительнице недугов человеческих.

Радуйся, и грешныя люди любовию твоею не оставившая; радуйся, о просвещении душ наших возревновавшая.

Радуйся, труды многия Евангелия ради подъявшая; радуйся, сего ради велия в Царствии Небеснем пронареченная.

Радуйся, лика девственниц украшение; радуйся, полка мученическаго похвало преславная.

Радуйся, преподобномученице Христова, Параскево всеславная.

Кондак 6

Проповедником Христовым, богоносным Апостолом верно подражала еси, Параскево многострадальная, и в проповедании Евангелия чрез все житие твое подвизалася еси, человеки во спасение уловляющи. Темже чудес дарованием от Христа Бога обогатилася еси, о них же и невернии в веру приидоша и воспеша Богу: Аллилуиа.

Икос 6

Возсияла еси, яко звезда, на тверди Церкви Христовой, Параскево добропобедная, и всем нам образом жития твоего светиши ясно, темже верою и любовию память твою святую почитающе, вопием ти:

Радуйся, подвижнице Божия, постом и молитвою воспитанная; радуйся, голубице непорочная, кротости и незлобия преисполненная.

Радуйся, за своя мучители молитвы Господеви приносившая; радуйся, Христу, Спасителю нашему, тем уподобившаяся.

Радуйся, злобу врагов добром препобедившая; радуйся, Стефана первомученика венцу поревновавшая.

Радуйся, евангельских заповедей верная исполнительнице; радуйся, неверия грозная обличительнице.

Радуйся, кающихся прощения от Бога скорая подательнице; радуйся, верных ко спасению добрая наставнице.

Радуйся, сердца наша умиления исполняющая; радуйся, помыслы наша к Богу возносящая.

Радуйся, преподобномученице Христова, Параскево всеславная.

Кондак 7

Хотящи душу свою за Христа положити, Его ради многая мучения претерпевши, от нечестиваго мучителя Тарасия во главу усечена была еси, но от Христа венец нетленный на главу свою прияла еси, душею же твоею в горния обители райския востекла еси, идеже со Ангелы и всеми святыми сладце поеши Богу: Аллилуиа.

Икос 7

Новый живот вечный прияла еси, богохвальная, егда мечною кончиною от плоти разрешившися, на брак Небеснаго Жениха возшла еси. Его же молти не престай за ны, грешныя, любовию страдания твоя чествующия и глаголющия присно:

Радуйся, мученическое течение твое мечною кончиною увенчавшая; радуйся, тем главу невидимаго змия стершая.

Радуйся, во гласе пения ангельскаго на небо душею твоею воспарившая; радуйся, мученический лик на небесех возвеселившая.

Радуйся, постнический полк возрадовавшая; радуйся, девственнаго сонма веселящее украшение.

Радуйся, постническое житие, мученическую же кончину в себе сочетавшая; радуйся, и нас о добродетелех ревновати подвизающая.

Радуйся, свято и непорочно на земле пожившая; радуйся, идольскую лесть обличившая.

Радуйся, демоны посрамившая; радуйся, мучителю помысл покаяния вложившая.

Радуйся, преподобномученице Христова, Параскево всеславная.

Кондак 8

Странно есть неверным видети, како от единаго молитвеннаго призывания имени твоего святаго, Параскево многострадальная, недужным исцеления подаются и духи нечистии от человек отбегают, нам, грешным, тебе в помощь призывающим и поющим Богу: Аллилуиа.

Икос 8

Вся Церковь Христова честная страдания твоя, святая и всехвальная преподобномученице, прославляет, исцелений же благодать от тебе приемлет и радостно взывает ти, глаголющи:

Радуйся, в житии по смерти многими чудесы прославленная; радуйся, дары целебныя независтно подающая.

Радуйся, любящим и чтущим тя любовию сугубою воздающая; радуйся, во благих прошения наша скоро исполняющая.

Радуйся, в недузех страждущия благодатно посещающая; радуйся, неисцельныя болезни скоро исцеляющая.

Радуйся, болезни терпети хотящим помощь дарствующая; радуйся, душевныя страсти поборати помогающая.

Радуйся, яко на подвиг долготерпения твоего зряще, малодушия нашего устыждаемся; радуйся, яко мужество твое воспоминающе, воинствовати на плоть подвизаемся.

Радуйся, в животе твоем многия люди просветившая; радуйся, по преставлении твоем множайшия роды во благочестии утвердившая.

Радуйся, преподобномученице Христова, Параскево всеславная.

Кондак 9

Вси Ангели Небеснии и святых лицы радостно тя, преподобномученице, сретоша, егда во врата Царствия Небеснаго возшла еси, воеже мзду твоим подвигом и страданиям от Господа прияти; убо и нам, недостойным, наследие вечное со святыми испроси, молящи да сподобит нас Господь купно с тобою пети Ему во Царствии Небеснем: Аллилуиа.

Икос 9

Витийство человеческое не довлеет, воеже по достоянию тя, Параскево всеблаженная, прославити, обаче любовию твоею побеждаеми, приносим ти хваления сицевая:

Радуйся, со Христом вечно царствующая и о нас Его умоляющая; радуйся, дары Его Божественныя молитвами твоими щедро нам подающая.

Радуйся, кающимся снизхождение; радуйся, подвизающимся благое наставление.

Радуйся, от горних высот к земнородным милостию приникающая; радуйся, искушения демонская молитвою твоею отражающая.

Радуйся, ветвь победную в шуицу свою приявшая; радуйся, всем, во спасении труждающимся, помощь невидимо подающая.

Радуйся, Ангелом прореченная; радуйся, и собеседнице Ангелов явившаяся.

Радуйся, ум наш горе возносящая.

Радуйся, преподобномученице Христова, Параскево всеславная.

Кондак 10

Спастися молящимся ти пособляющи, святая преподобномученице, с верою приходящим в храм твой святый, дары благодатныя присно подаеши и всякое во благих прошение наше скоро исполняеши, яко дерзновение велие ко Христу Богу стяжавши. Ему же радостно поеши победную песнь: Аллилуиа.

Икос 10

Стеною молитв твоих, преподобномученице, от всякаго искушения диавольскаго нас огради, да не порадуется враг падениям нашим, но тобою крепко да посрамится в нас, хвалебно зовущих ти:

Радуйся, по Бозе и Богородице крепкое наше упование; радуйся, непостыдное в бедах предстательство.

Радуйся, в сонних видениих верных посещающая; радуйся, и неверным дары целебныя милостиво подавающая.

Радуйся, звездо Божия благодати, еюже мрак в нас прогоняется; радуйся, чудес пучино, всех нас неоскудно напояющая.

Радуйся, воздержанием древней Иудифи уподобившаяся; радуйся, мужеством сию превозшедшая.

Радуйся, яко Христовы мироносицы Христа возлюбившая; радуйся, Тому верная в мучениях своих пребывшая.

Радуйся, по глаголу Его прославленная; радуйся, Того выну лицем к лицу созерцающая.

Радуйся, преподобномученице Христова, Параскево всеславная.

Кондак 11

Пение наше хвалебное не довольно есть к прославлению многих и предивных чудотворений твоих, святая преподобномученице, обаче, яко благая и милостивая Христова подражательница, благосердием твоим на нас грешных воззри и святыми и благомощными твоими молитвами ко Господу мир душевный нам испроси, воеже взывати Богу: Аллилуиа.

Икос 11

Светлыми лучами чудес немерцаемо сияеши, Параскево Богохвальная, вся же, благочестно жити хотящия, благодатно к незаходимому Солнцу правды, Христу Богу, путеводиши, зовущих ти сице:

Радуйся, целомудрия цвете драгий и прекрасный; радуйся, мировместилище ароматы райскими преисполненное.

Радуйся, от исполнения твоего и нам дары благодатныя неискудно источающая; радуйся, доблестная исповеднице Христова, благодатию облеченная.

Радуйся, во смирении твоем на Небеси и на земли дивно возвеличенная; радуйся, нищетою временною богатство нетленное стяжавшая.

Радуйся, о Царствии Божием плач духовный выну явльшая; радуйся, в мучениях телеси своего плачу не предавшаяся.

Радуйся, кротостию твоего языка Христу унаследовавшаяся; радуйся, правды Его алкавшая.

Радуйся, о пище тленней Его ради забывшая; радуйся, милость Божию и на неверных молитвою твоею призывавшая.

Радуйся, преподобномученице Христова, Параскево всеславная.

Кондак 12

Благодать Господня молитвами твоими источнику воды от лет древних зде даровася. Темже и храму Божию со обители дев создатися тамо во имя твое благоволила еси. Сию убо выну присещай и не забуди духовных чад твоих, в преподобии тебе подражати хотящим и поющим Богу: Аллилуиа.

Икос 12

Поюще твоя подвиги и страдания и многая чудеса твоя, святая и всехвальная Параскево, молимся ти прилежно: молися о нас к прославльшему тя Владыце о еже избавитися нам от погибели вечныя, часть же спасаемых улучити, благодарно зовущим:

Радуйся, венценосице, от руки Христовы увенчанная; радуйся, чистотою сердца Боговидения сподобившаяся.

Радуйся, многия люди, Христу тобою уверовавшия, Богу примирившая; радуйся, ненависть от человек Христа ради приявшая.

Радуйся, страшныя муки Его ради подъявшая; радуйся, с светлою свещею на брак Жениха Небеснаго пришедшая.

Радуйся, свеще Божия ревности, елеем милости исполненная; радуйся, душы наша мастию Духа Святаго, в тебе живущаго, умащающая.

Радуйся, дщерь благословенная Отца Небеснаго; радуйся, яко мзда твоя многа на Небеси.

Радуйся, яко молитвы твоя действенны на земли; радуйся, яко силы твоея трепещут преисподнии.

Радуйся, преподобномученице Христова, Параскево всеславная.

Кондак 13

О, святая и многострадальная преподобномученице Параскево! Приими милостивно моление сие наше и умоли Святую и приснопокланяемую Троицу избавити нас от мучений вечных и сподобити вкупе с тобою Царствие Небесное улучити и вечно Создателю нашему пети: Аллилуиа.

Этот кондак читается трижды, затем 1-й икос «Ангел Господень…» и 1-й кондак «Взбранной невесте Христовой…».

Молитва

О, святая и многострадальная преподобномученице Параскево! К тебе, аки теплей за ны к Богу молитвеннице, припадаем и прилежно молимся: умоли Господа и Владыку нашего пробавити милость Свою к нам, недостойным рабом Его, даровати же нам душевное и телесное здравие, земли плодоносие, воздуха благорастворение, во благочестии христианстем преуспеяние, к житию временному нужная и довольная, и вся ко спасению потребная; да мирно и благочестно поживше, сподобимся благую кончину христианскую улучити и Царствие Небесное наследити. Ей, предстательнице наша благая! Не посрами упования нашего, еже по Бозе и Пресвятей Богородице крепкое на Тя возлагаем, но буди нам ходатаица во спасение, да сподобимся вкупе с тобою и всеми святыми в радости блаженства вечнаго славити во твоем заступлении великую милость Бога нашего, Отца, и Сына, и Святаго Духа, ныне и присно, и во веки веков. Аминь.