Апостол и евангелист Иоанн Богослов

Величаем тя, апостоле Христов и Евангелисте Иоанне Богослове, и чтем болезни и труды твоя, имиже трудился еси во благовестии Христове.

О, великий апостоле, евангелисте громогласный, Богослове изящнейший, тайновидче неизреченных откровений, девственниче и возлюбленный наперсниче Христов Иоанне! Приими нас, грешных, под твое сильное заступление прибегающих. Испроси у Всещедраго Человеколюбца Христа Бога нашего, Иже пред очесы твоими Кровь Свою за ны, непотребныя рабы Своя, излиял есть, да не помянет беззаконий наших, но да помилует нас и сотворит с нами по милости Своей: да дарует нам здравие душевное и телесное, всякое благоденствие и изобилие, наставляя нас обращати оная во славу Его, Творца, Спасителя и Бога нашего, по кончине же временныя жизни нашея от немилосердных истязателей на воздушных мытарствах да избавит нас, и тако да достигнем, тобою водимии и покрываемии, Горняго онаго Иерусалима, егоже славу ты во откровении зрел еси, ныне же нескончаемыя радости наслаждаешися. О, великий Иоанне! Сохрани вся грады и страны христианския, храм сей, служащих и молящихся в нем, от глада, губительства, труса и потопа, огня и меча, нашествия иноплеменных и междоусобныя брани; избави нас от всякия беды и напасти и молитвами твоими отврати от нас праведный гнев Божий, и Его милосердие нам испроси, да вкупе с тобою сподобимся прославляти в невечернем дни пресвятое имя Отца и Сына и Святаго Духа во веки веков. Аминь.

О, великий и всехвальный апостоле и евангелисте Иоанне Богослове, наперсниче Христов, теплый наш заступниче и скорый в скорбех помощниче! Умоли Господа Бога даровати нам оставление всех прегрешений наших, елика согрешихом от юности нашея во всем житии нашем делом, словом, помышлением и всеми нашими чувствы; во исходе же душ наших помози нам, грешным, избавитися от воздушных мытарств и вечнаго мучения, да твоим милостивным предстательством прославляем Отца и Сына и Святаго Духа, ныне и присно и во веки веков. Аминь.

Песнь 1

Ирмос: Во глубине постла иногда, фараонитское всевоинство преоруженная сила, воплощшееся же Слово всезлобный грех потребило есть, препрославленный Господь, славно бо прославися.

Царство Небесное блаженне, еже проповедал еси восприим, и Слову собеседник быв Небесному, верующия честному твоему проповеданию, и Богословию, твоими молитвами сохрани.

Крепок смысл являя, о всех небрегл еси сущих на земли и уз естества: и Слову всемудре, словесне же и умне сопребывая, от безсловесия безсловесне живушия свободил еси.

Небесных разум приим Богословеснейше, Бога Слова проповедал еси: в начале бе Слово, и Слово бе к Своему Родителю, и Бог бе Слово, благовествуя научил еси.

Богородичен: Отроковиц Божественных лик, Божественнейше в женах Тя Добрую воспевают, Богородице Владычице, добротами украшену Божества: добротворительное бо Слово паче слова родила еси.

Песнь 3

Ирмос: Процвела есть пустыня, яко крин Господи, языческая неплодящая Церковь пришествием Твоим, в нейже утвердися мое сердце.

Троицы явил еси Богословным языком твоим, юже паче ума тайну, Иоанне Богоблаженне: в нейже утвердися мое сердце.

Язык твой бысть писменника трость Всесвятаго Духа, Богописанно знаменующий Честное Твое и Божественное Евангелие.

Мудрости ты бездну почерпл еси всемудре, возлег Богомудренным дерзновением на премудрости Источнице: и Сего Богопроповедник был еси.

Богородичен: Едину Девствующую и Матерь чтим, яко спасения Ходатаицу бывшу нам Всенепорочная, и мир избавльшую молитвами Твоими.

Седален, глас 8.

Премудрости на перси возлег, и разуму сущих научився, Божественно возгремел еси: в начале бе Слово, добре написав первый безначальное Рождество, и проповедал еси всем Слова воплощение. Темже и языком яко мрежею уловив языки, благодатию Духа изучаеши концы, и просвещаеши чудесы, Богослове Апостоле, моли Христа Бога, грехов оставление даровати празднующим любовию святую память твою.

Песнь 4

Ирмос: Пришел еси от Девы, не ходатай, ни Ангел, но Сам Господи, воплощся, и спасл еси всего мя человека. Тем зову Ти: слава силе Твоей, Господи.

Слово тя Богослова достойно показа, того Божества тайнонаучив преизящнейше, и еже по человеку строению научив неизреченному.

Ум Божествен и девственно тело стяжав, храм был еси, живый же и одушевленный славне, и жилище Всепетыя Троицы священнейшее.

Сыновством Пречистыя Девы почествовался еси, девственниче блаженне, и брат показался еси Избравшему тя, и ученика Богослова совершившему.

Богородичен: Исцеляя Евы древнее преступление, в Тя Всенепорочную и Пречистую вселися Пребожественный, всего мя человека вообразити падша.

Песнь 5

Ирмос: Ходатай Богу и человеком был еси Христе Боже: Тобою бо, Владыко, к Светоначальнику Отцу Твоему от нощи неведения приведение имамы.

Небесный ум Богослове, явился еси благодатию, весь свет быв, еже к Началосвету приближением, и чистым твоим зрением, еже к Нему, обожаемь.

Умом чистым, и святыми устнами Богодохновенне, и пречистыми усты твое Евангелие проповедал еси: и общее спасение всем верным предложил еси.

Со Христом живый от младенства, орган благодати от Него предложен был еси, Богословии изобучаемь, и Троичестей славе паче естества научаемь.

Богородичен: Глаголы Твоя поминающе, Тя ныне блажим: Тобою Всенепорочная блаженство неизреченное и жизнь нестареюшуюся истинно прияхом.

Песнь 6

Ирмос: В бездне греховней валялся, неизследную милосердия Твоего призываю бездну: от тли, Боже, мя возведи.

Иисус, Бог мой и Господь, твою чистоту приим, и всесовершенную святость, брата тя Богослове, прият.

Венчав свято житие твое, сице уповав, Мудрости возлегл еси на перси славне, и благодать оттуду извлекл еси.

Великая и Божественная сияния Богословия твоего, всю просветиша славне вселенную, и светом Трисолнечным озариша.

Богородичен: Небо прострый волею, небо земное иное распростре Тя Богомати Чистая, и из Тебе возсияв явися.

Кондак, глас 2

Величия твоя, девственниче, кто повесть? Точиши бо чудеса, и изливаеши исцеления, и молишися о душах наших, яко Богослов и друг Христов.

Икос

Высоты небесныя уведети и моря глубины испытати дерзостно есть и непостижно: якоже бо звезды исчислити и приморский песок невозможно отнюд, сице ниже яже Богослова рещи довольно: толицеми того венцы Христос, Егоже возлюби, венча: Емуже и на перси возлег, и на Тайней вечери с Ним яде, яко Богослов и друг Христов.

Песнь 7

Ирмос: Богопротивное веление беззаконнующаго мучителя высок пламень вознесло есть, Христос же простре Богочестивым отроком росу духовную, Сый благословен и препрославлен.

Божественным сияя светолитием, Духа Святаго ясно Богословил еси, исходяща из Безначальнаго Отца, и почивающа в Сыне неотходно, яко Единосущна.

В тебе, блаженне, положи правды Солнце селение: небо приснодвижимо тя соделавый, и Богословным твоим языком проповедуемый Христос, возлюбленне, препрославленный.

Глагол твоих сила, Божественное вещание изыде, всеблаженне досточудне, и премирное твое Евангелие всю объяше землю догматов величеством.

Богородичен: Пречистое зачатие, нетленно Рождество Ты Едина показала еси, Дева пребывши: Бога бо зачала еси над всеми Сущаго Чистая, Человека бывша, верных на спасение и избавление.

Песнь 8

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.

Якоже молния светлая проходящи, вселенней, блаженне, явился еси, чистоты светлостию, девства же блистанием, и благочестия догматы, мир просвещая, возлюбленне, Христу Богу.

Тело и душу, и ум очистив, благовестил еси Небесное Христово Евангелие: и Ангелом единожитель на небесех быв, зовеши ныне: благословите, вся дела Господня, Господа.

Столп светел, возложение же Божественно, небеснаго храма был еси, и престол чувствия, и мудрости приятелище, Богословия орган, поя: благословите, вся дела Господня, Господа.

Богородичен: Да клятву первую истребиши, и смертное осуждение древле праматере, из Девы Богоматере Слове Божий родился еси, всем даровав безсмертие негиблемо.

Песнь 9

Ирмос: Безначальна Родителя Сын, Бог и Господь, воплощся от Девы нам явися, омраченная просветити, собрати расточенная. Тем всепетую Богородицу величаем.

Ныне не в гаданиих, но лицем к лицу, сладости поток зрети удостоился еси: и реку мира, и источник безсмертия: имже ныне напаяемь, наслаждаешися обожения.

Наземное просил еси седалище прияти от Христа, но Он тебе перси Своя дарует: на няже возлег Богослове, твердым и пребывающим седением добрым обогатился еси, Апостолов украшение.

Мудрости погасил еси еллинския безбожное, в начале бе Слово, мудре провещав, и к Богу бе Слово, и истинно Бог бе Слово, Имже вся быша, видимая же и невидимая.

Богородичен: Яко утро обрелася еси утреннее в нощи жития, девства зарями облистающи, восток Солнца мысленнаго правды нам явльшая, Богомати Всечистая.

Светилен

Яко душею девственна тя, и телом блаженне Слово избра, Богослове девственниче, и того Божества чудна показа писца и слугу, иже и от земли преставился еси, не умер, но в Бозе жив, и безсмертен пребывая.

Песнь 1

Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.

Во глубины духа мыслию озарився приник, и Рождество страшное нам ясно сказал еси, вопия Богослове: в начале бе Слово Божие.

Приклоняеми множеством напастей, и страстей, и скорбей, и лютых нахожденьми, верою прибегаем к тебе Богослове, помощник буди рабом твоим.

Душ наших страсти лютыя, яко врач изряден, уврачив мудре, вечнаго избави ны осуждения и огня, ходатайством твоим.

Богородичен: Бога Заченшая нас ради бывшаго Человека, Того умоли, Чистая, в День Суда нас ущедрити, многая согрешивших Ему.

Песнь 3

Ирмос: Несть свят, якоже Ты, Господи Боже мой, вознесый рог верных Твоих Блаже, и утвердивый нас на камени исповедания Твоего.

Умом светлым и чистым беседовав к Слову, Богослове треблаженне, тайнонаучился еси от Него, сущим вышше слова яве, и всю тварь просветил еси.

Уз мя избави лютых греха, треблаженне, любовию связуя мя Владыки и Бога, Егоже возлюбил еси тепле, и Богослов Того нареклся еси.

Дался еси защитник нам и ходатай, и избавитель, и ко Господу молебник, и чудес самоделатель, и источник исцелений, Богослове. Темже тя почитаем.

Богородичен: Егда Слово, Еже из Тебе воплотившееся неизреченно Богородице, на Древо вознесеся Креста, девственнику ученику, яко Деву Отроковицу Тебе вручи.

Седален, глас 8

Премудрости на перси возлег, и разуму сущих научився, Божественно возгремел еси: в начале бе Слово, добре написав первый безначальное Рождество, и проповедал еси всем Слова воплощение. Темже и языком яко мрежею уловив языки, благодатию Духа изучаеши концы, и просвещаеши чудесы, Богослове Апостоле, моли Христа Бога, грехов оставление даровати празднующим любовию святую память твою.

Песнь 4

Ирмос: Христос моя сила, Бог и Господь, честная Церковь боголепно поет взывающи, от смысла чиста о Господе празднующи.

Каплями напоил еси Слова славне, подсолнечную всю, мутныя нечестия воды изсушил еси благочестне: сего ради тя почитаем.

Крепостию опояши и державою, молюся, разслабленную всякими нанесеньми душу мою, всемудре, от нечистых врагов прибегающую в кров твой.

Храм быв Божественнаго Духа, в храме твоем Божественнем верою приседящия, храмы покажи Божия Богослове, ходатайством твоим.

Богородичен: Божественный храм Божий воспоим, Святую Деву ясне вси блажим, обожени бывше Ею, и от лютых избавляеми.

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, Истиннаго Бога, от мрака греховнаго взывающа.

Яко утро просиял еси сушим на земли, восток мысленный ясно проповедуя, Апостоле, миру, в плоти пришедший, и многобожия тму разоривший.

Богословии твоими священными, всяку напоил еси душу, священнопроповедниче Апостоле. Темже ти зову: изсохшее сердце мое грехми все напой.

Уранихся стрелами вражиими, всего мя уздрави, мудре, предстательством твоим, молюся: и на пути мя Божия управи, присно в беззакониих заблуждаема.

Богородичен: Егда предстала еси со возлюбленным учеником у Креста Сына Твоего Всенепорочная: стенала еси плачущи, и дивилася еси Того еже к человеком многому состраданию.

Песнь 6

Ирмос: Житейское море воздвизаемое зря напастей бурею, к тихому пристанищу Твоему притек вопию Ти: возведи от тли живот мой, Многомилостиве.

Бысть яко трость скорописца, истинно Богословный язык твой, добропишущий разумение истинное, и закон зело новейший, на скрижалех Богослове сердец наших.

Увядивый искоренно нечестия отрасли, яко возделатель всеизряднейший: в души же моей страх Божий насади славне, добродетелей благоплодие процветающее.

Сына Девы Тя, из Тоя прошедый преявленно именова: с Неюже молися, положением всем сыном Божиим быти, всеприснопамятне, творящим благоугодная Ему.

Богородичен: В подобии плоти познася человеком Бог из Тебе Всенепорочная: Егоже моли всегда, плоти нашея мудрования, Всечистая, умертвити пагубная.

Кондак, глас 2

Величия твоя, девственниче, кто повесть? точиши бо чудеса, и изливаеши исцеления, и молишися о душах наших, яко Богослов и друг Христов.

Икос

Высоты небесныя уведети и моря глубины испытати дерзостно есть и непостижно: якоже бо звезды исчислити и приморский песок невозможно отнюд, сице ниже яже Богослова рещи довольно: толицеми того венцы Христос, Егоже возлюби, венча: Емуже и на перси возлег, и на Тайней вечери с Ним яде, яко Богослов и друг Христов.

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси Боже отец наших.

Гром разшумевший во вся концы воспоим Богослова: имже всяк истинно слух огромлен взятся от земли, и величается Христос всех Творец.

Обзорно дому твоего благолепие всяку просвещает мысль: в немже всегда собирающеся боголепне поем всяческих Творца, и благохвалим тя верно суща предстателя нашего.

Яко звезду тя светлосияющую вемы, светоносными сиянии твоими просвещатися, учениче, молимся, Христов, избавляющися от тмы страстей и напастей всеразных ходатайством твоим.

Богородичен: Благословим тя, Всенепорочная, Рождшую Благословеннаго Господа, благословеньми разоршаго Божескими проклятое естество человеческое, и обновившаго ны обветшавшия тлею.

Песнь 8

Ирмос: Из пламене преподобным росу источил еси, и праведнаго жертву водою попалил еси: вся бо твориши Христе, токмо еже хотети. Тя превозносим во вся веки.

Риторствующим языком, блаженне, благообительствовал еси, и умершия злобою, вся живоуловил еси, священную твою приемшия проповедь. Темже тя чествуем, яко таинника неизреченных.

Яко иный рай Божественный дом твой показася, чудесы якоже цветы, всех души веселя, Апостоле, и страстей прогоняя зловоние.

Боже, Боже мой, вонми ми, и избави мя от врагов на кийждо день находящих мне, и смиренное сокрушающих сердце мое, имея молящагося Тебе Божественнаго ученика Твоего.

Богородичен: Иисуса Спаса, Егоже воплотила еси от чистых кровей Твоих, Богорадованная, испроси ущедрити ны, рабы Твоя, и от вечныя муки изъяти.

Песнь 9

Ирмос: Бога человеком невозможно видети, на Негоже не смеют чини Ангельстии взирати: Тобою бо, Всечистая, явися человеком Слово воплощенно. Егоже величающе, с Небесными вои, Тя ублажаем.

Часов и времен Господь Сый Избавитель в преполовении дне на Кресте висяше, и тебе предаде якоже девственнику, блаженне, Приснодеву, славу неотъемлему дая еже величати тя.

Сый с горними Божественными Силами, и с ними Божественное восклицая песнопение, яже в дому твоем святом поющия, и песнословящия Преблагаго, спасай ходатайствы твоими честными, Христов Апостоле.

Верою просящия тя спасай ны от всякия беды, Богослове блаженне, шествия наша яже ко Господу, духом направляя, и путевождствуя ны на путь мира, заповедей Вседержителя.

Богородичен: Глас приносим Ти благодарствен Божии Матери светло и возопием: радуйся, престоле Божий превысочайший, радуйся, света облаче, радуйся, раю, Еюже райския сладости сподобихомся.

Светилен

Яко душею девственна тя, и телом блаженне Слово избра, Богослове девственниче, и того Божества чудна показа писца и слугу, иже и от земли преставился еси, не умер, но в Бозе жив, и безсмертен пребывая.

Кондак 1

Избранный Господем от мрежей рыбарских на проповедь Евангелия и от ловли рыб на уловление человеков во свет истиннаго боговедения, великий Апостоле, учениче, друже и наперсниче Христов, моли единаго истиннаго Человеколюбца, Егоже ты приискренне возлюбил еси, да помилует нас, ищущих твоего к Нему предстательства и зовущих ти:

Радуйся, Иоанне Апостоле, наперсниче Христов и Богослове.

Икос 1

Ангельских сил и всякия твари Творца, Владыку и Господа, восприемшаго плоть нашу и явльшагося на земли спасения нашего ради, узрев ходяща при мори Галилейстем и взывающа тя со братом твоим, Иоанне блаженне, в звание апостольства, оставль мрежи рыбарския и отца твоего в корабли, неуклонно оттоле последовал еси стопам Спасителевым. Сего ради вопием ти сице:

Радуйся, любве ради ко Христу отца по плоти оставивый; радуйся, Христом Небеснаго Отца обретый.

Радуйся, мир и вся его прелести презревый; радуйся, небесная благая в воздаяние получивый.

Радуйся, плоть духу совершенно поработивый; радуйся, дух твой Сладчайшему твоему Учителю Иисусу покоривый.

Радуйся, Иоанне Апостоле, наперсниче Христов и Богослове.

Кондак 2

Видя Христос Господь непорочную чистоту твоего сердца, плотскими сластьми не омраченную, суди тебе достойна быти зрения таинственных откровений, яко да, проницая во глубину богословия, возможеши проповедати тое во услышание всего мира. Сего ради «сын громов» от Господа наречен был еси и Тому возопил еси: Аллилуиа.

Икос 2

Разумом истиннаго богопознания озаряя твою душу, шествовал еси вослед Благаго Учителя твоего, поучаяся из уст Его исходящей премудрости, и совершеннаго ради твоего незлобия и девственнаго целомудрия был еси возлюблен Христом Господем твоим. Услыши убо ны, воспевающия ти сице:

Радуйся, незлобия рачителю; радуйся, девства и чистоты хранителю.

Радуйся, любве к Богу и ближним учителю; радуйся, добрых нравов наставниче.

Радуйся, смиренномудрия зерцало; радуйся, Божественныя благодати светило.

Радуйся, Иоанне Апостоле, наперсниче Христов и Богослове.

Кондак 3

Силу Божества Христова, сокрытую под облаком немощнаго человеческаго естества, познал еси явно, егда Господь наш, воскрешая дщерь Иаирову и последи преображаяся на Фаворе, сподоби тя со инема двема ученикома свидетеля быти таковых преславных чудес. Уведев же, яко Христос есть Бог истинный, из глубины сердца твоего воззвал еси Ему: Аллилуиа.

Икос 3

Имея велие дерзновение к возлюбившему тя Христу Сыну Божию, возлегл еси на персех Его при совершении Тайныя Вечери, и егда прорицаше Господь о предателе Своем, тогда един ты дерзнул еси вопросити о имени его. Сего ради вопием ти:

Радуйся, возлюбленный Христов учениче; радуйся, присный Его друже.

Радуйся, невозбранно на персех Господних возлежавый; радуйся, дерзновенно о имени предающаго вопросивый.

Радуйся, паче иных ко Христу ближайший; радуйся, словеса Господня, якоже сокровище многоценное, слагавый в сердце своем.

Радуйся, Иоанне Апостоле, наперсниче Христов и Богослове.

Кондак 4

Буря ярости и злобнаго неистовства жестокосердых и неблагодарных иудеев, егда воста на Христа Сына Божия, тогда вси ученицы Его, страхом объяти бывше, бежаша; но ты, любовь крепльшую к Нему имея, даже до Креста и смерти не отступил еси от Него, на вся муки Христовы взирая и соболезнуя сердцем Деве Матери Божией, плачущей и рыдающей. Удивляяся же крайнему милосердию и долготерпению Божию, взывал еси к Пострадавшему за род человеческий: Аллилуиа.

Икос 4

Вися на Кресте пригвожденный за грехи наша Спас мира и видев тя и Матерь Свою предстоящия, сына тя Преблагословенней Деве Богородице вдал есть, глаголя Ей: «Жено, се сын Твой, - и тебе паки: - Се Мати твоя». Мы же, дивящеся любви Христове, на тебе явленней, воспеваем сице:

Радуйся, сын Божия Матере быти сподобивыйся; радуйся, того ради наипаче ко Христу, яко некиим духовным родством, присвоивыйся.

Радуйся, Матери Божией достойно послуживый; радуйся, Сию, якоже матерь свою, во всякой чести у себя имевый.

Радуйся, и во Успении честное и святое Ея тело ко гробу проводивый; радуйся, со блистающеюся райскою ветвию, Архангелом Гавриилом принесенною, одру Ея предшедый.

Радуйся, Иоанне Апостоле, наперсниче Христов и Богослове.

Кондак 5

Боготечная звезда явился еси во Асии, отшед в ню на проповедание слова Божия, якоже жребием указася тебе. Но на пути твоем попусти Господь быти тебе ввержену в море: благодать же Божия, всегда с тобою пребывающая, сохрани тя в водах морских жива, и по четыренадесятих днех повеле волне морстей, да воспенившися извержет тя на брег. Егда же узре сия ученик твой Прохор, уже много плакавый о кончине твоей, велиим гласом воззва чудодействующему Богу: Аллилуиа.

Икос 5

Видевше ефесстии жителие преславное чудо, тобою сотворенное, егда отрока Домна, умерщвленнаго от беса, молитвою твоею воскресил еси, воспеша велегласно силу Бога, тобою им проповеданнаго, и избавльшеся от гнуснаго идолослужения, взываху тебе сице:

Радуйся, истиннаго Бога служителю; радуйся, бесов прогонителю.

Радуйся, мертвецы силою Христовою оживляяй; радуйся, тою жизнь и здравие людем возвращаяй.

Радуйся, помраченныя умом к Свету Истины призываяй; радуйся, правыя веры просвещением к добродетели наставляяй.

Радуйся, Иоанне Апостоле, наперсниче Христов и Богослове.

Кондак 6

Проповедник богоносный слова Божия во Ефесе был еси, и, усердствуя о распространении благодати евангельския, утверждал еси твое учение знаменьми великими и чудесами, капище же Артемидино единою молитвою низпровергл еси, да зряще сие, язычницы познают Единаго Бога, Емуже мы вопием: Аллилуиа.

Икос 6

Возсия во Ефесе, якоже солнце, свет веры Христовы, тобою проповеданныя, егда злочестивый Дометиан воздвиже гонение на христианы; тогда и тебе, яко усерднаго исповедника имене Христова, посла епарх в Рим связана, идеже и претерпел еси страшная мучения. Тех ради благочестно возглашаем ти сицевая:

Радуйся, Христова ради исповедания биенный; радуйся, чашу смертоноснаго яда невредно испивый.

Радуйся, в котле елеа кипящаго не сваривыйся; радуйся, силою Христовою в лютых мучениих цел сохранивыйся.

Радуйся, твоим невреждением кесаря, мучащаго тя, устрашивый; радуйся, сим же народ о величествии Бога, от христиан почитаемаго, уверивый.

Радуйся, Иоанне Апостоле, наперсниче Христов и Богослове.

Кондак 7

Егда узре мучитель, яко и лютейшия муки, яже от него претерпел еси, не возмогоша умертвити тебе, тогда, возмнев тя безсмертна быти, во остров Патмос на изгнание осуждает. Ты же, повинуяся Промыслу Божию, тако благоволившему, благодарственно воспевал еси Богу, вся во благое устрояющему: Аллилуиа.

Икос 7

Новая чудеса показал еси язычником, ища обратити их ко спасительной вере Христове, егда плывущу ти во изгнание твое, повелением твоим отрока утопшаго море на корабль жива изверже, буря укротися, вода сланая в сладкую претворися, воин от чревнаго недуга исцелися, и по пришествии твоем в Патмос, бес пытливый, будущая прорицавый, из одержимаго им изгнася. Тогда вси зрящии таковая дивная знамения, тобою совершаемая, прихождаху к познанию Триипостаснаго Бога и крещахуся. Мы же тя ублажаем тако:

Радуйся, морю и бури повелеваяй; радуйся, сатанинския духи от человек изгоняяй.

Радуйся, болезни единым словом исцеляяй; радуйся, всем в нуждах помощь подаваяй.

Радуйся, чудесы твоими идолопоклонники удививый; радуйся, учением твоим неверныя во истенней вере утвердивый.

Радуйся, Иоанне Апостоле, наперсниче Христов и Богослове.

Кондак 8

Странно бе видети жрецем Аполлоновым, яко храм бога их и вся бывшия в нем идолы ты единым словом на землю низпровергл еси. Чудящеся убо о сем и ярящеся на таковое твое дерзновение, идоша к волхву некоему, велию силу от сатаны в себе имевшему, просяще его, да отмстит безчестие бога их; он же, слеп сый душею, не ведая силы, в тебе обитающия, покушашеся привидении различными тебе устрашити и на тя народ подвигнути: обаче сам окаянный погрузися в море и тамо погибе, безсильным бывшим бесом спасти его, ты бо воспретил еси им именем Иисуса Христа Сына Божия, Егоже прослави народ, чудесе свидетель, воспев: Аллилуиа.

Икос 8

Весь исполнен быв любве Божественныя, явился еси вместилище даров Святаго Духа: будущая прорицал еси, отстоящая, яко близ сущая, возвещал еси, недужныя исцелял еси, жене игемона на острове Патмосе, в болезни рождения страждущей, едва на праг дому ея вступив, облегчение даровал еси. Приими убо от нас, грешных, похвалы сицевыя:

Радуйся, благодати Божия вместилище; радуйся, Духа Святаго обиталище.

Радуйся, реко чудоточная цельбоносныя в болезнех силы; радуйся, источниче наставлений, приводящих к познанию правыя веры.

Радуйся, коварства лукаваго сатаны обличаяй; радуйся, верныя от козней его защищаяй.

Радуйся, Иоанне Апостоле, наперсниче Христов и Богослове.

Кондак 9

Всякое беззаконие истребляя ревностно от среды людей, к нимже послан был еси, обличил еси прельщение идолопоклонников, иже почитаху беса, во образе волка превелика людем являвшагося, и многия от них к вере Христове привел еси: таже капище Вакхово молитвою твоею разрушил еси, и волхва Нукиана вкупе с домашними его к покаянию чудесы твоими обратил еси. Тии же, от греха ко спасению обратившеся, немолчно взываху Богу: Аллилуиа.

Икос 9

Витийство мудрости человеческия не возможет изрещи, ниже ум плотскаго человека постигнути, яже ты возвестил еси нам о безначальнем бытии Триипостаснаго Бога: подобно бо Моисею, во громех и блистаниих на горе приял еси от Бога тайну богословия и возгласил еси миру, яко в начале бе Слово, Отцу искони неразлучное и всему сущему виновное, имущее Свет Жизни, Егоже тьма не может объяти. Озаряеми таковым облистанием света Божественныя Истины, почитаем тя яко таинника Безначальныя Троицы и воспеваем тя яко Богослова совершеннейшаго:

Радуйся, орле, воспаривый до самаго огнеобразнаго Престола Божия; радуйся, трубо, возвестившая миру Предвечнаго и Безначальнаго Бога.

Радуйся, человечество и Божество Христово нам изъясняяй; радуйся, дивная словеса и наставления Господня во Евангелии твоем нам возвещаяй.

Радуйся, любви делом и истиною нас научаяй; радуйся, пребывающим в любви пребывание в них Бога обещаваяй.

Радуйся, Иоанне Апостоле, наперсниче Христов и Богослове.

Кондак 10

Спасти хотя души человеческия, всяко поучал еси люди веровати во Христа Сына Божия, имети совесть незазорну и любити друг друга, да возмогут не токмо зде, но и в селениих праведных воспети лепотно Всемогущему Богу: Аллилуиа.

Икос 10

Стены Горняго Иерусалима узрев во откровении, возвестил еси нам, яже тамо видел еси и яже имут быти до скончания мира, сказуя нам сие иносказательными словесы, яже может разумети только ум, имеяй мудрость. Удивляющееся таковому дару пророчествия, тебе от Бога дарованному, воспеваем тя сице:

Радуйся, познанием Сущаго и Иже бе и Грядущаго превозшедый естество человеческое; радуйся, вместилище таинств, невместимых человеческим умом, бывый.

Радуйся, неизреченная Божия откровения узревый; радуйся, сия верным преподавый.

Радуйся, радости святых еще в жизни сей познавый; радуйся, оными ныне в преизбыточествии наслаждаяйся.

Радуйся, Иоанне Апостоле, наперсниче Христов и Богослове.

Кондак 11

Пение благодарственное принесе тебе, святый Апостоле Иоанне, христианин, иже в нищету пришед и не имый чим воздати своим заимодавцем, во отчаяние впаде и искаше сам себе умертвити; ты же, проповедник любве ко ближним сый, желая избавити того от временныя и вечныя смерти, крестным знамением сено во злато претворил еси и сие тому вручил еси, да сим златом и долги отдаст заимодавцем, и дом свой пропитает, Богу же, тобою его облагодетельствовавшему, да поет: Аллилуиа.

Икос 11

Светозарная душа твоя, достигши в меру возраста совершеннаго, познала есть приближение времене, егда подобает тленному наследити нетление и смертному обещанное безсмертие. Скончавая убо земное житие твое, повелел еси учеником твоим землею покрыти до верха тело твое; слышавше же о сем, сущии во граде братия приидоша ко гробу твоему и, откопавше, ничтоже в нем обретоша. Темже познавше, яко изменение твое сотворися не обычным человеческим смертным успением, воспеша тебе тако:

Радуйся, орле, обновивый юность твою приближением к Солнцу Славы Божия; радуйся, таковым изменением превозшедый вся уставы естества человеческаго.

Радуйся, по обетованию Благаго Учителя твоего возседый на единем от дванадесяти престолов; радуйся, творяй на том суд и правду посреде людей Божиих Израиля.

Радуйся, наслаждаяйся лицезрением Сладчайшаго Иисуса, к Немуже на перси прежде Его страсти и Воскресения возлегл еси; радуйся, от Его милосердия ходатайствуяй нам вся благая.

Радуйся, Иоанне Апостоле, наперсниче Христов и Богослове.

Кондак 12

Благодать дана бысть от Бога месту тому, идеже тело твое земли предано бяше, да испускает в день погребения твоего тонкий прах на исцеление болящим, показуя сим чудом, како прославляет Бог любящия Его, да вси, зряще сие, непрестанно сердцем и усты во дни и в нощи вопием Ему: Аллилуиа.

Икос 12

Поюще труды твоя во апостольстве и чудеса и исцеления, яже источал еси и источаеши благодатию Духа Святаго, в тебе обитаюшаго, восхваляем Бога, даровавшаго нам таковаго путеводителя, наставляющаго нас на путь спасения и милосердующаго о немощех наших. Приими убо от нас, святый Апостоле, похвалы сицевыя:

Радуйся, благовестниче веры Христовы усерднейший; радуйся, учителю Церкве Христовы изряднейший.

Радуйся, богословов начало и основание; радуйся, Божественных Таин возвестителю.

Радуйся, девствующих образе и целомудрия правило; радуйся, всех верных, ко твоему заступлению прибегающих, скорый помощниче и покровителю.

Радуйся, Иоанне Апостоле, наперсниче Христов и Богослове.

Кондак 13

О преславный и всехвальный Апостоле и Евангелисте, наперсниче Христов возлюбленный Иоанне! Твоим всесильным ходатайством ко Всеблагому твоему Учителю и нашему Владыце и Господу испроси нам вся благая временная и вечная и христианскую кончину жития нашего, да с тобою и со ангельскими лики в селении праведных воспоем Триипостасному Богу: Аллилуиа.

Этот кондак читается трижды, затем 1-й икос «Ангельских сил…» и 1-й кондак «Избранный Господем от мрежей рыбарских…».

Молитва

О, великий Апостоле, Евангелисте громогласный, Богослове изящнейший, тайноведче неизреченных откровений, девственниче и возлюбленный наперсниче Христов Иоанне! Приими нас, грешных, под твое сильное заступление прибегающих. Испроси у Всещедраго Человеколюбца Христа Бога нашего, Иже пред очесы твоими Кровь Свою за ны, непотребныя рабы Своя, излиял есть, да не помянет беззаконий наших, но да помилует нас и сотворит с нами по милости Своей: да дарует нам здравие душевное и телесное, всякое благоденствие и изобилие, наставляя нас обращати оная во славу Его, Творца, Спасителя и Бога нашего, по кончине же временныя жизни нашея от немилосердных истязателей на воздушных мытарствах да избавит нас, и тако да достигнем, тобою водимии и покрываемии, Горняго онаго Иерусалима, егоже славу ты во откровении зрел еси, ныне же нескончаемыя радости наслаждаешися. О, великий Иоанне! Сохрани вся грады и страны христианския, храм сей, служащих и молящихся в нем от глада, губительства, труса и потопа, огня и меча, нашествия иноплеменных и междоусобныя брани; избави нас от всякия беды и напасти и молитвами твоими отврати от нас праведный гнев Божий, и Его милосердие нам испроси, да вкупе с тобою сподобимся прославляти в невечернем дни пресвятое имя Отца и Сына и Святаго Духа во веки веков. Аминь.

Кондак 1

Избранный от мрежей рыбарских на проповедь Евангелиа, и от ловли рыб на уловление человеков во свет истиннаго боговедения, о, великий Апостоле, учениче, друже и наперсниче Христов, моли Единаго Истиннаго Человеколюбца, Егоже ты серафимскою любовию возлюбил еси, да помилует нас, ищущих твоего к Нему предстательства, и зовущих ти: Радуйся, Иоанне Апостоле, наперсниче Христов и Богослове.

Икос 1

Ангельских сил и всякия твари Творца, Владыку и Господа, восприемшаго плоть нашу, и явльшагося на земли спасения нашего ради, узрев ходящаго при мори Галилейстем, и взывающаго тя с братом твоим, Иоанне блаженне, в звание апостольства, оставль мрежи рыбарския и отца твоего в корабли, неуклонно оттоле последовал еси стопам Спасителевым. Сего ради вопием ти сице: Радуйся, мрежею Христовою уловленный. Радуйся, воистину ловец человеков явивыйся. Радуйся, дом свой и родителей ради Господа оставивый. Радуйся, мир и вся его прелести презревый. Радуйся, чистоты и целомудрия дивный хранителю. Радуйся, Христом Богом возлюбленный. Радуйся, избранный и верный Христов учениче. Радуйся, собору апостольскому сопричтенный. Радуйся, истины Царствия Божия уразумевый. Радуйся, тайнозрителю судеб Божиих. Радуйся, небесный Ангеле, во образе земнаго человека явивыйся. Радуйся, апостолом любве нареченный. Радуйся, Иоанне Апостоле, наперсниче Христов и Богослове.

Кондак 2

Видя Христос Господь непорочную чистоту твоего сердца, плотскими страстьми не омраченную, суди тебе достойна быти зрения таинственных откровений, имиже проникая во глубину богословия, возможеши проповедати оное во услышание всего мира и сего ради нарече тя сына Громова. Ты же невозвратно последовал еси Христу, непрестанно поя Ему: Аллилуиа.

Икос 2

Разумом истиннаго богопознания озаряя твою душу, шествовал еси по благом Учителе твоем, учася из уст Его исходящей премудрости, и ради совершеннаго твоего незлобия, и девственнаго целомудрия, был еси возлюблен Христом Господем твоим. Услыши убо нас, воспевающих ти сице: Радуйся, вместилище благодатныя силы Божия. Радуйся, премудрости Божия проповедниче. Радуйся, ум божественный стяжавый. Радуйся, Христово Евангелие нам оставивый. Радуйся, тобою бо Дух Святый дарова словеса спасения. Радуйся, яко писании твоими тайны веры нам открываеши. Радуйся, свет божественнаго учения в сердце своем носивый. Радуйся, яко и нас тем же светом озаряеши. Радуйся, семя слова Божия в сердца многих людей всеявый. Радуйся, к познанию истинныя веры тех наставивый. Радуйся, всю вселенную богословием твоим просветивый. Радуйся, яко Церковь Христова Богослова тя нарече. Радуйся, Иоанне Апостоле, наперсниче Христов и Богослове.

Кондак 3

Силу Божества Христова, сокрытую под облаком немощнаго человеческаго естества, познал еси явно, егда воскрешаяй дщерь Иаирову, и потом преображаяйся на Фаворе, сподоби тя со иными двема токмо ученики свидетели быти таковых преславных чудес. Познав же Христа Бога истиннаго, из глубины сердца твоего воззвал еси Ему: Аллилуиа.

Икос 3

Имея велие дерзновение к возлюбившему тя Христу, Сыну Божию, возлегл еси на персех Его при совершении тайныя вечери, и егда прорече Господь о предатели Своем, тогда един ты дерзнул еси вопросити о имени того. Сего ради вопием ти: Радуйся, возлюбленным учеником от Господа нареченный. Радуйся, присный Его друже. Радуйся, во взаимней братстей любви с иными апостолы поживый. Радуйся, на непоколебимом камени заповедей Христовых утвердивыйся. Радуйся, невозбранно на персех Господних почивый. Радуйся, дерзновенно о тайне предательства вопросивый. Радуйся, воплотившемуся Богу Слову верно послуживый. Радуйся, даров великих от Него сподобивыйся. Радуйся, разум небесный приемый. Радуйся, светом добродетелей твоих Бога прославивый. Радуйся, светильниче сущым во тьме и сени смертней. Радуйся, закон любве Божия на скрижалех сердец наших написавый. Радуйся, Иоанне Апостоле, наперсниче Христов и Богослове.

Кондак 4

Буря ярости и зверскаго неистовства жестокосердных и неблагодарных иудеев пригвозди ко Кресту Христа Бога, волею пострадати за вся люди изволившаго, тогда вси ученицы Его, страхом объяти бывше, бежаша; но ты, апостоле всехвальный, питая к Нему любовь множайшую паче иных, на вся муки Христовы взирая, у Креста пребыл еси неотступно, сердечно состражда Деве, Матери Божией, плачущей и рыдающей, и удивляяся крайнему милосердию и долготерпению Божию, взывал еси к Пострадавшему за род человеческий: Аллилуиа.

Икос 4

Слышав Апостол Иоанн Божественный глас Господа к Матери Своей, при Кресте с тобою стоящей: «Жено, се сын твой», и тебе паки: «Се Мати твоя», повеление Владыки и Бога своего исполняя, послужил еси тайне всыновления Божией Матери чрез тебе всех верующих во Христа. Мы же, на Великую Заступницу и Матерь Света все упование возлагающе, вопием тебе, Апостоле, таковой тайне послужившему: Радуйся, усыновления Божия Матере сподобивыйся. Радуйся, хранити Ю в жизни земней призванный. Радуйся, пред Крестом Спасителя до конца предстоявый. Радуйся, верность Господу до смерти сохранивый. Радуйся, Божиею Материю возлюбленный. Радуйся, благоговейный Ея служителю. Радуйся, Пресвятыя Девы Богородицы сомолитвенниче. Радуйся, воли Ея святыя исполнителю. Радуйся, во успении ко гробу честное и святое Ея тело проводивый. Радуйся, с блистающею райскою ветвию, Архангелом Гавриилом принесенною, одру Ея предшедый. Радуйся, пред Пречистою Девою Мариею верный наш ходатаю. Радуйся, яко с Нею у престола Христова о нас умоляеши. Радуйся, Иоанне Апостоле, наперсниче Христов и Богослове.

Кондак 5

Боготечная звезда явился еси во Асии, отшед в ню на проповедание Слова Божия, по жребию тебе падшему, но прежде попусти Господь быти тебе поглощену в мори, благодать же Божия, всегда с тобою пребывающая, сохрани тя во глубинах морских жива и по четыредесятих днех, повеле волне морстей воспенившися извергнути тя на брег, идеже узре тя ученик твой Прохор, уже оплакиваяй твою кончину, и велиим гласом воззва чудодействующему Богу: Аллилуиа.

Икос 5

Видевше ефесстии жителие преславное чудо, тобою сотворенное, воскресением отрока Домна, умерщвленнаго от беса, в бани пребывающаго, воспеша велегласно силу Бога, тобою им проповеданнаго, и избавльшеся от поклонения идолом, взываху тебе сице: Радуйся, лучами благодати Божия осиянный. Радуйся, благоухания духовнаго преисполненный. Радуйся, во благовестии Христове добре потрудивыйся. Радуйся, многих приведый к познанию Сына Божия. Радуйся, помраченныя умом к свету истины призываяй. Радуйся, веры истинныя громогласный проповедниче. Радуйся, многобожия тму разоривый. Радуйся, идолом поклонение угасивый. Радуйся, непобедимую силу и власть на демоны приемый. Радуйся, яко мертвых силою Божиею воскрешал еси. Радуйся, молитвами твоими землю озаривый. Радуйся, чудесы многими прославленный. Радуйся, Иоанне Апостоле, наперсниче Христов и Богослове.

Кондак 6

Проповедник богоносный слова Божия быв во Ефесе, и усердствуя о благовестии Евангельския истины, подкреплял еси твое учение знаменми страшными и неудобь постигаемыми. Единою бо молитвою разрушил еси капище Артемидино, да зряще сие идолопоклонницы, познают Единаго Истиннаго Бога и воспевают Ему хвалебную песнь: Аллилуиа.

Икос 6

Возсия во Ефесе свет веры Христовы, тобою проповеданныя, егда злочестивый Домитиан воздвиже гонение на христианы, тогда и тя, яко усерднаго исповедника имене Христова, посла епарх в Рим связана, идеже и претерпел еси страшная мучения. Темже мы с любовию память твою чтим и взываем тако: Радуйся, яко любве ради ко Господу жизни своея не щадил еси. Радуйся, исповедниче веры во Христа неустрашимый. Радуйся, идолов и кумиров языческих сокрушивый. Радуйся, язычников о величии Бога, христианы почитаемаго, уверивый. Радуйся, правды ради заключение и узы претерпевый. Радуйся, Христова ради исповедания биенный. Радуйся, яко чашу смертоноснаго яда невредно испил еси. Радуйся, в конобе елея кипящаго не сваривыйся. Радуйся, в лютых мучениих от смерти чудесно спасенный. Радуйся, кесаря Домитиана и клевретов его сим удививый. Радуйся, яко свирепство мучителей твоих победил еси. Радуйся, слуг диавола посрамивый. Радуйся, Иоанне Апостоле, наперсниче Христов и Богослове.

Кондак 7

Хотя мучитель злочестивый к идолослужению привести тя, Апостоле святый; обаче ты, благодатию Божиею укрепляемь, лютейшия муки претерпел еси и от веры Христовы никакоже отступил еси. Егда же не возмогоша нечестивии умертвити тя, тогда возомнив тя безсмертна, в изгнание на остров Патмос осудиша. Ты же, повинуяся промыслу Божию, тако благоволившему, с благодарностию воспевал еси Богу, вся во благая устрояющему: Аллилуиа.

Икос 7

Новая показал еси чудеса идолопоклонником, ища обратити их к спасительнеи вере Христове, егда пловущу ти во изгнание твое, повелением твоим, отрока утопшаго море на корабль жива изверже, буря укротися, вода сланая в сладкую претворися, воин от чревныя язвы исцелися, и по пришествии твоем в Патмос, бес пытливый из Аполлонида изгнася. Тогда вси зрящии таковая непостижимая события, прихождаху к познанию Триипостаснаго Бога. Темже тя вси, яко Апостола Христова, ублажаем тако: Радуйся, благодатию Святаго Духа напоенный. Радуйся, светильниче, миру языческому огнем благодати Божия светивый. Радуйся, яко Господин жатвы призва тя на ниву Свою. Радуйся, яко в вертограде Того добре потрудился еси. Радуйся, остров Патмос молитвами твоими освятивый. Радуйся, великою святынею христианства остров сей утвердивый. Радуйся, морю и буре повелеваяй. Радуйся, духов злобы от человек изгоняяй. Радуйся, отроча от потопления морскаго избавивый. Радуйся, болезни единым словом исцеляяй. Радуйся, яко многая люди из тьмы неверия в чудный свет Христов привел еси. Радуйся, яко и ныне мудрости Христове верных научаеши. Радуйся, Иоанне Апостоле, наперсниче Христов и Богослове.

Кондак 8

Странно бе видети жрецем аполлонова храма, яко дом того, егоже они безумнии яко Бога почитаху, ты единым словом на землю низпровергл еси: темже чудящеся купно и ярящеся на таковое твое дерзновение, идоша к волхву Кинопсу, усердному предстателю бесов, да отмстит поругание их бога. Он же, слеп сый душею, не ведая силы, в тебе обитающия, покушашеся мечтании и разными привидении тебе устрашити, и на тя народ подвигнути, но сам окаянный, надеяся на волхвования своя, погрузися в море, и тамо утонул есть, взывая безсильным спасти его бесом, воспрещенным тобою именем Иисуса Христа, Сына Божия, Егоже прослави народ, сего чуда свидетель, воспев: Аллилуиа.

Икос 8

Весь исполнен любве Божественныя, был еси вместилище даров Святаго Духа: будущая прорицая, отстоящая яко близ сущая открывая, недужныя исцеляя, жене анфипатовой, в болезни рождения страждущей, едва в дом ея вступил еси, облегчение даровавый. Приими убо от нас грешных похвалы сицевыя: Радуйся, велие дерзновение ко Христу Богу стяжавый. Радуйся, приемый от Него власть на духи нечистыя. Радуйся, силою Божиею языческое капище разоривый. Радуйся, язычников в вере истинней утвердивый. Радуйся, замыслы противников веры разрушивый. Радуйся, громе, поражаяй древняго змия и его ангелов. Радуйся, яко коварство лукаваго сатаны изобличил еси. Радуйся, яко всех верных от козней его защищаеши. Радуйся, от тьмы неразумия и страстей нас избавляяй. Радуйся, помощниче всем ищущим спасения и истиннаго просвещения. Радуйся, в проповедании истины ревность велию явивый. Радуйся, словеса жизни вечныя нам оставивый. Радуйся, Иоанне Апостоле, наперсниче Христов и Богослове.

Кондак 9

Всякое беззаконие истребляя ревностно от среды людей, к нимже послан бысть, низпровергл еси единым словом капище бахусово, Нукиана волхва чудесы препрев, из волка соделал еси кроткаго агнца, и привел еси ко Христовой вере, и мать, неистовным разжжением блуднаго греха к сыну, обличив, обратил еси к покаянию, онии же, от греха обратившеся ко спасению, немолчно взываху Богу: Аллилуиа.

Икос 9

Витийство любомудрия человеческаго не возможет изрещи, ниже ум плотскаго человека постигнути, еже ты возвестил еси нам о безначальном бытии Триипостаснаго Бога: подобно бо Моисею во громех и блистаниих на горе приял еси от Бога тайну Богословия, и возгласил еси миру, еже в начале бе Слово, Отцу искони неразлучное, и всему существующему виновное, имущее свет жизни вечныя, егоже тьма не может объяти. Темже почитаем тя, яко таинника безначальныя Троицы, и воспеваем тя, яко совершеннейшаго богослова: Радуйся, сосуде избранный Духа Святаго. Радуйся, Церкве Христовы украшение и славо. Радуйся, на высоту богословия возшедый. Радуйся, Троицу Нераздельну миру проповедавый. Радуйся, богословити Отца, и Сына, и Святаго Духа нас научивый. Радуйся, Светом Трисолнечным верных озаривый. Радуйся, истины Воскресения Христова громогласный свидетелю. Радуйся, яко тебе истинному богословию Сам Бог Слово научил еси. Радуйся, орле, воспаривый до самого огнеобразнаго престола Божия. Радуйся, яко учением Божественным всю подсолнечную напоивый. Радуйся, образ истинныя мудрости показавый. Радуйся, любви к Богу и ближнему нас научивый. Радуйся, Иоанне Апостоле, наперсниче Христов и Богослове.

Кондак 10

Спасти хотя душы человеческия, всяко поучал еси люди веровати во Христа, Сына Божия, имети совесть незазорну, и любити друг друга, во еже не токмо зде, но и в селениих праведных воспети радостно Всемогущему Богу: Аллилуиа.

Икос 10

Стены горняго Иерусалима узрев во откровении, преподал еси нам проречение того, еже есть, и имать быти до скончания мира, открывая нам сие иносказательными словесы, и предоставляя разумети имущим ума божественнаго. Удивляющеся таковой премудрости, тебе от Бога дарованней, воспеваем тя сице: Радуйся, зрителю неизреченных Божиих откровений. Радуйся, познанием Альфы и Омеги превозшедый естество человеческое. Радуйся, Божия мудрости сокровенное Слово извещавый. Радуйся, радость неизглаголанную и жизнь вечную миру проповедавый. Радуйся, богословствующих умов просвещение. Радуйся, яко и нас к небесному наследию наставил еси. Радуйся, свеще, пламенем Божественныя любве возжженная. Радуйся, яко от восток солнца даже до запад хвально имя твое. Радуйся, власть вязати и решити грехи наша от Господа приемый. Радуйся, служителю таин Христовых. Радуйся, учением твоим Христа всех Творца возвеличивый. Радуйся, радости святых еще в жизни сей познавый. Радуйся, Иоанне Апостоле, наперсниче Христов и Богослове.

Кондак 11

Пение, яко жертву благодарну, принесе тебе, святый Апостоле Иоанне, оный христианин, иже в нищету пришед, и не имый чим воздати долги своим заимодавцем, впаде в отчаяние, и искаше себе насильственною смертию умертвити: но ты, человеколюбив сый, желая избавите того и временныя, и вечныя смерти, крестным знамением сено в злато претворив, вручил еси оному убогому, да тем златом и долги отдаст заимодавцем, и дом свой препитает, Богу же, чрез тебе его облагодетельствовавшему, да поет: Аллилуиа.

Икос 11

Светоприемный светильник истиннаго света был еси, Апостоле Иоанне, во тме многобожия седящих путеводяй к Истинному Богу. Егда же познал еси приближение времене отшествия своего к возлюбленному Господу, тогда повелел еси учеником твоим погребсти тебе жива, наутрие же пришедше тии ко гробу твоему, и откопавше, ничтоже в нем обретоша, познавше убо, яко благословением Божиим совершися сие чудо, и воспеша тебе тако: Радуйся, яко солнце в добродетелех просиявый. Радуйся, свято жизнь земную скончавый. Радуйся, во славе от земли на Небо преселивыйся. Радуйся, от Царя Небеснаго венец безсмертия приемый. Радуйся, светом вечным на Небеси осиянный. Радуйся, яко и нас благодатным светом просвещаеши. Радуйся, звездо пресветлая, всех приводящая к Солнцу Правды Христу. Радуйся, светильниче, мрак душ наших любовию озаряяй. Радуйся, по обетованию благаго Учителя твоего возседый на единем от дванадесяти престолов. Радуйся, творяй на оном суд и правду посреде людей Божиих Израиля. Радуйся, дивный наставниче всех ищущих спасения. Радуйся, яко фимиам молитв твоих о всем мире христианстем приносиши Христу Богу. Радуйся, Иоанне Апостоле, наперсниче Христов и Богослове.

Кондак 12

Благодать дана бысть от Бога месту тому, идеже тело твое земли предано бяше, да испускает в день погребения твоего тонкий прах на исцеление болящым, показующе сим чудом, како прославляет Бог любящия Его, да вси, зряще сие, непрестанно сердцем и душею во дни и в нощи вопием Ему: Аллилуиа.

Икос 12

Поюще труды твоя во апостольстве и чудеса и исцеления, яже источал еси, и источаеши благодатию Духа Святаго, в тебе обитающаго, восхваляем Бога, даровавшаго нам таковаго путеводителя, наставляющаго нас на путь спасения, и милосердствующаго о нас, грешных. Приими убо от нас, святый Апостоле, похвалы сицевыя: Радуйся, священнаго лика апостольскаго сопричастниче. Радуйся, Церкве Христовы неугасимый светильниче. Радуйся, яко с тобою Ангели ликуют на Небеси. Радуйся, яко человецы с любовию восхваляют тя на земли. Радуйся, всех христиан великое утешение. Радуйся, яко многи храмы и обители имене твоего незримо охраняеши. Радуйся, православными людьми российскими возлюбленный. Радуйся, о стране и народе нашем пред Богом и Пресвятою Богородицею ходатаю теплый. Радуйся, любящым и чтущым тя любовию святою воздаваяй. Радуйся, всещедрый о нас предстателю. Радуйся, яко Преблагословенную Матерь Господа ходатайствовати о нас, грешных, преклоняеши. Радуйся, яко предстательством твоим у Христа Бога вечное спасение нам подаеши. Радуйся, Иоанне Апостоле, наперсниче Христов и Богослове.

Кондак 13

О, преславный и всехвальный Апостоле и Евангелисте, наперсниче Христов, возлюбленный Иоанне, благоприятным твоим и всесильным ходатайством ко всеблагому Твоему Учителю и нашему Владыце и Господу избави нас от всяких бед, скорбей и болезней, испроси нам вся благая временная и вечная, и христианскую кончину живота нашего, да с тобою на Небеси со Ангельскими лики и всеми святыми воспоем Богу: Аллилуиа.

Этот кондак читается трижды, затем 1 -й икос: «Ангел предстатель...» и 1-й кондак: «Ангельских сил...».